Þinglýsing:
Nauðsynlegt er að þinglýsa kaupsamningi strax hjá viðkomandi sýslumannsembætti. Það er mikilvægt öryggisatriði.

Greiðsla kaupverðs: Fyrsta greiðsla samkvæmt kaupsamningi fer að jafnaði fram við undirritun kaupsamnings. Aðrar greiðslur fara fram samkvæmt kaupsamingi en venjulegast er að kaupandi greiði beint inn á reikning seljanda ef ekki er um neinar uppgreiðslur v/ lána eða annarra gjalda að ræða.  Mikilvægt er að kaupandi greiði á gjalddaga umsamdar greiðslur til að forðast dráttarvexti. 

Uppgreiðsla áhvílandi lána: Ef greiða á upp gömul lán og taka ný er mikilvægt að leggja saman lögveðskröfur og áhvílandi veðskuldir til að ganga úr skugga um að staða kaupanda sé nægilega tryggð.  Þegar uppgreiðsla á sér stað geta tvær leiðir verið farnar:
lánveitandi kaupanda fer á síðasta veðrétt og gefið er út skilyrt veðleyfi þannig að andvirði hins nýja láns er notað til uppgreiðslu áhvílandi veðskulda og mismunurinn á lántökufjárhæð og uppgreiðslufjárhæð lána er lögð á reikning seljanda.
Lánveitendur áhvílandi veðskulda veita skilyrt veðleyfi þannig að þau hleypa nýja láninu fram fyrir sig gegn því að löggiltur fasteignasali eða lögmaður ábyrgist uppgreiðslu lánanna. 
 
Yfirtaka áhvílandi lána:
Ef kaupandi ætlar að yfirtaka áhvílandi veðskuldir er staða þeirra við yfirtöku sú fjárhæð sem þau eru í á afhendingardegi eignarinnar.  Þar sem tími líður á milli undirritunar kaupsamnings og afhendingu eignarinnar geta lánin verið hærri eða lægri á afhendingardegi en þau voru við undirritun kaupsamnings þar sem kaupverðið er fastsett hefur þetta þau áhrif að lokagreiðslan hækkar eða lækkar í samræmi við stöðu lánanna.  Seljandi greiðir vexti af yfirteknum lánum fram að afhendingu.  Fasteignasalan Domus sér alfarið um þetta uppgjör á lánum og vöxtum á milli kaupanda og seljanda. 
 
Veðflutningur: Ef seljandi ætlar að flytja áhvílan lán af eigninni þá skal hann leggja fram yfirlýsingar þess efnis við undirritun kaupsamnings, þó getur komið fyrir að þess sé ekki þörf ef kaupandi á eftir að greiða hærri greiðslu en sem nemur uppgreiðsluverðmæti þess láns sem flytja skal og er tryggingin fyrir kaupandann þá alltaf sú að hann hefur möguleika á því að nota andvirði eftirstöðva kaupsamnings til uppgreiðslu á áhvílandi veðskuld og skuldajafna á móti greiðslu sem honum bar að greiða  Fasteignasalinn skal sjá um að hagsmunir kaupanda og seljanda séu tryggðr að þessu leyti. 

Kostnaður kaupanda

Þinglýsing: Kostnaður við hvert þinglýst skjal er kr. 1.350 krónur.

Stimpilgjald: Kaupandi greiðir stimpilgjald af nýjum lánum sem er 1,5% af höðuðstóli. Kaupandi greiðir einnig stimpilgjald af kaupsamningi sem er 0,4% af fasteignamati húss og lóðar.

Skuldabréf: Kostnaður vegna lántöku getur verið mismunandi eftir því um hvaða lánastofnun er að ræða en oftast er um 1% lántökukostnað að ræða. Rétt er að benda kaupendum á að kynna sér vel kjör lána og kostnað við þau áður en ákvörun er tekin.

Stimpilsektir: Ef stimpilskyld skjöl eru ekki stimpluð innan 2ja mánaða frá útgáfudegi fá þau á sig stimpilsekt sem er 10% af stimpilgjaldi viðkomandi skjals. Sektin fer þó aldrei yfir 50%.

Skipulagsgjald: Skipulagsgjald er greitt af nýreistum húsum. Af hverri byggingu sem reist er skal greiða 3% í eitt sinn af brunabótamati hverrar húseignar. Nýbygging telst hvert nýreist hús sem virt er til brunabóta svo og viðbyggingar við eldri hús ef virðingarverð hinnar nýju viðbyggingar nemur 1/5 af verði eldra hússins. Þetta á einnig við um endurbætur sem hækka brunabótaverð um1/5.